افكار تجارية للاستثمار في تقنية الواقع الافتراضي

افكار مشاريع للاستثمار في تقنية الواقع الافتراضي VR

الواقع الافتراضي (virtual reality) من الكلمات اللي أثارت جدل كبير في عدد من الدول الأجنبية، ما بين هل أن ده من أعظم اكتشافات البشرية ولا هو حاجه من الحاجات اللي هتسبب فشل في التواصل الاجتماعي المباشر ما بين الناس، بس قبل ما نقرر هل هو نهاية للتواصل البشري ولا تكنولوجيا جديدة هتغير من شكل عرض المحتوى، تعالى نشوف الأول أيه هو الvr وإزاي ممكن يطبق في البزنس.

الواقع الافتراضي هو تقنية بتوفر القدرة على التفاعل مع صور الكمبيوتر بطريقة لم يتم اختبارها من قبل حيث أنه باستخدام التقنية دي بيصبح بإمكان المشاهد أنه يعيش تجربة واقعية للمحتوى اللي هو بيشوفوا من خلال نظارات ابتكرتها شركات عالمية زي سامسونج وجوجل بتخليك تعيش في الفيديوهات اللي بتتفرج عليها، يعني تخيل معايا كده أنت دلوقتي لابس النظارة وبتتفرج على إعلان فهتلاقي نفسك واقف وسط الممثلين كأنك موجود معاهم بالظبط.

بس الموضوع موقفش عند فكرة نضارة وفيديوهات وبس، لا ده كبر وبدأت صناعات كتير تتجه للتكنولوجيا دي عشان تقدم تجربة جديدة للمستخدم مشافهاش قبل كده، تعالوا نشوف أفكار مشاريع اتعملت بالvr ونفكر سوا عن مدى جدواها في السوق المصري.



1- كافيهVr
من سنة 2004 وفكرة الإنترنت كافية موجودة في مصر وقدرت أنها تثبت نفسها وتستمر في الوجود حتى وقتنا هذا، وبعدها بفترة ظهرت فكرة محلات البلاي ستشن، اللي أتطورت بعد كده وبدأت تظهر البلاي ستشن كافيه وعلى نفس النهج في عدد من الدول الأجنبية زي أمريكا وألمانيا وتايلند ظهرت مشاريع ال vr كافيه، اللي هو عبارة عن أتاحه الفرصة للعملاء أن هما يجربوا التكنولوجيا دي في أماكن عامة.

وبالنسبة لتطبيق الفكرة دي في السوق المصري، فهي تعتبر فكرة مربحة وده لأنها هتبقى جديدة على السوق وناس كتير هتتجه لتجربتها ده غير أن السوق المصري كبير فتشبع السوق من خدمة زي دي مش هيحصل بسهولة بالإضافة إلى أن أحنا في مصر بقينا بنهتم بالتكنولوجيا الجديدة ده غير أن الفكرة بدأت تظهر في العديد من الأماكن.

وديه مجموعة من الأنشطة اللي ممكن تعملها في الإنترنت كافيه:
• مشاهدة أفلام ثلاثية الأبعاد
• لعب ألعاب VR
• استخدام ال vr في السوشيال ميديا
• قراءة الكتب ثلاثية الأبعاد
• التأمل
• التمشية

2- المشاريع العقارية
من الاستخدامات المفيدة لمجال العقارات هو استخدام نظارات ال vr في العروض على العملاء يعني تخيل كده أن العميل اللي جاي يتفرج على مشروع معين لسه تحت الإنشاء وأنت كموظف مبيعات بدل ما تفرجه على ماكيت وخرائط هتخليه بكل بساطة يلبس النظارات دي ويتفرج كأنه داخل العقار اللي هيشتريه.

الفكرة نفسها مش جديدة، في شركات عقارية كتير بره بدأت تطبق التكنلوجيا دي، وأظن أن حاجة زي كده في السوق المصري هتبقى مفيدة لمجال العقارات خاصة أن أحنا في مصر بنبيع مشاريع بيكون قدامها فترات طويلة حتى معاد تسليمها، بس نخلي بالنا من أن العميل المصري في سوق العقارات ما بيثقش في العقار إلا بعد الاطلاع على الأوراق والرسومات التوضيحية.

3- التسويق باستخدام الvr
الواقع الافتراضي في التسويق بيعتبر من الأحلام اللي لو اتحققت هتقدر تغير من ملامح الصناعة بالكامل، فتخيل كده أنك تلاقي نفسك عايش في الإعلان يعني مثلاً تلاقي نفسك بتغني مع سيد شيبه في إعلان فودافون، أو واقف جنب محمد رمضان في إعلان إتصالات، ده غير أن في استخدامات تانيه كثير المسوقين هيلجئوا ليها للتسويق لمنتجاتهم زي فيديوهات VR ترويجية بزاوية 360 درجة، وإعلانات الواقع الافتراضي واستخدام ال vr في السوشيال ميديا، بس ماظنش أن تطبيق الvr في صناعة التسويق في مصر هيكون بالسهولة اللي أحنا متخيلنها لأن بكل بساطة عشان ينتشر لازم ينتشر معاه تواجد النظارات مع الجمهور وهو شيء صعب لأن سعر النضارة بيبداء بـ 99 دولار.

4- الvr في الرياضة
مش مستبعد أن في يوم تلاقي نفسك لابس نظارة وبتتفرج على الماتش كأنك قاعد في الاستاد بالظبط أو أنك تحضر كاس العالم من غير ما تروح روسيا بس أن الموضوع ده يطبق في مصر فمتهيألي هيكون صعب شوية وده لأن الكاميرات ال 360 اللي بتصور كل الزوايا من الصعب أن أحنا نوفرها عشان نستخدمها لتصوير المباريات.

5- الvr في المكتبات
من الأفكار اللي انتشرت وأطبقت في عدد من الدول هي المكتبات الافتراضية اللي بتتيح للمستخدم أنه من خلال نضارة الvr هيقدر أنه يزور مكتبات مشهورة ويقرا كتب ويحضر ندوات ويشارك في ورش عمل، بس الميزة الحقيقية في الفكرة دي هي أنها هتدي فرصة للأشخاص اللي بيعانوا من إعاقات جسدية في أنهم يحصلوا على فرصة للتعلم والتطوير من نفسهم.

في النهاية.. الـ vr تكنولوجيا جديدة وأكيد هيبقى ليها تأثير على البيزنس بشكل كبير في الفترة الجايه، وعلى الرغم من أن ناس كتير بتقولك أنها ممكن تفشل فأحب أقولك أن الموبايلات اللي بتشتغل بالمس ناس كتير قالوا أنها هتفشل في البداية فعشان كده حاولوا تتابعوا الفترة الجاية التكنولوجيا دي، عشان ممكن تكون فرصة قوية للبيزنس بتاعك.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *